Dywedwch wrth eich AS San Steffan y dylid adfer byd natur.
Mae angen natur ar bob un ohonom. Mae’n hanfodol ar gyfer ein bywydau. Yr aer yr ydym yn ei anadlu, y dŵr yr ydym yn ei yfed, a’r bwyd yr ydym yn ei fwyta. Ein hamddiffyniad rhag sychder a llifogydd. Nid yw’n rhywbeth dewisol, nac yn rhwystro twf. Nid yw’n elyn. Mae natur yn dirywio nawr. Heddiw, y DU yw un o’r gwledydd sydd wedi’i disbyddu fwyaf yn y byd o ran byd natur. Ond nid yw Llywodraeth y DU yn rhoi digon o sylw i hyn.
Dros y flwyddyn ddiwethaf, mae Llywodraeth y DU wedi gosod byd natur fel rhwystr rhag twf economaidd, wedi gwrthdroi amddiffyniadau amgylcheddol pwysig, ac nid yw ar y trywydd iawn i gyflawni ei haddewid i adfer byd natur.
Mae ein lleoedd a’n rhywogaethau mwyaf gwerthfawr, o goedwigoedd, parciau ac arfordiroedd i’r ehedydd a’r draenog, mewn perygl. A heb weithredu’n ddigonol i adfer byd natur, mae ein diogeledd bwyd yn y fantol, bydd ein dyfroedd yn parhau i gael eu llygru, a bydd y genhedlaeth nesaf yn etifeddu byd sydd mewn argyfwng dyfnach.
Mae yna ffordd arall. Trwy adfer natur nawr, gallwn greu gwlad sy’n ffynnu.
Mae arnom angen eich cymorth i alw am newid. Cyn Anerchiad y Brenin ym mis Mai, rydym ni’n gofyn i Lywodraeth y DU am dri pheth:
1. Adfer natur nawr – mae’n rhaid i’r Llywodraeth gyflawni ymrwymiad y DU i reoli 30% o’r tir er budd natur erbyn 2030. Mae hynny’n golygu dynodi mwy o le ar gyfer natur a thalu ein ffermwyr yn briodol er mwyn helpu natur i ffynnu.
2. Gwarchod natur a bywyd gwyllt – rhoi terfyn ar wanhau’r cyfreithiau sy’n eu gwarchod. Cyflwyno Bil Diwygio Dŵr i lanhau ein hafonydd, ein nentydd a’n moroedd, a sicrhau bod llygrwyr yn talu.
3. Adeiladu lleoedd i ymfalchïo ynddynt - mynnu bod cymunedau’n cynnwys digon o fyd natur a rhoi terfyn ar fynediad annheg i fannau gwyrdd, gan ddechrau drwy gyhoeddi cynllun gweithredu hir ddisgwyliedig y Llywodraeth erbyn diwedd y flwyddyn.
Mae’n amser penderfynu. A fyddwn ni’n creu byd sy’n ffynnu? Mae amser o hyd i Lywodraeth y DU newid trywydd a gwneud y peth iawn. I gynllunio dyfodol lle mae pobl a natur yn ffynnu. I warchod bywyd gwyllt a chefnogi cymunedau. Mae’n ddyletswydd ar y Llywodraeth i wneud hynny. Heb natur, nid oes dyfodol.
A wnewch chi siarad dros fyd natur?
Ychwanegwch eich llais drwy ysgrifennu at eich AS San Steffan lleol.
